Policia dhunon banorët, Rama shfaqje propagandistike me qytetarët

Policia dhunon banorët, Rama shfaqje propagandistike me qytetarët

Teksa dhjetra banorë të Unazës së Re janë në spital pas dhunës së policisë dhe qindra të tjerë po nxirren me forcë nga shtëpitë e tyre, Kryeministri Edi Rama po zhvillon shfaqjen propagandistike të radhës në platformën ‘Shqipëria që duam’.

Në një sallë të kryeministrisë mbushur me qytetarë, Rama njoftoi se do të zhvillojë bashkëbisedimin e përjavshëm me qytetarët të cilët i janë drejtuar platformës ‘Shqipëria që duam’ për të zgjidhur problemet e tyre.

Duke injoruar situatën e tensionuar dhe dhunën që po ushtrohet ndaj qytetarëve tek Unaza e Re, Rama tha se ‘çdo njeri i zakonshëm i këtij vendi gjen zgjidhje tek platforma e bashkëqeverisjes.’

Në Facebook, kryeministri shkroi se përmes platformës së bashkëqeverisjes ‘mjafton një klik dhe gjen një mik’.

Dhjetra qytetarë i kanë komentuar kryeministrit që të ndalë aksionin policor dhe dhunën ndaj banorëve tek Unaza e Re. Disa prej komentuesve me ironi e pyetën Ramën se ”si mund të gjejnë ‘një mik me një klik’ banorët që po dhunohen e po nxirren nga shtëpitë e tyre”.

Që prej orëve të para të mëngjesit, qindra policë kanë rrethuar banesat, kanë larguar me dhunë banorët dhe kanë nisur prishjen e banesave në zonën e Unazës së Re.

Deri tani 12 banorë janë shtruar në spital si pasojë e dëmtimeve nga gazi lotsjellës dhe dhuna e policisë.

Dhjetra banorë të tjerë janë shoqëruar në komisariatin e policisë.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>