PPE i bën thirrje shumicës dhe opozitës të dialogojnë për zgjidhjen e krizës

PPE i bën thirrje shumicës dhe opozitës të dialogojnë për zgjidhjen e krizës

Partitë e qendrës së djathtë europiane miratuan sot një rezolutë për Shqipërinë, ku shprehin mbështetje për zgjidhjen e krizës politike përmes dialogut dhe miratimin e një reforme elektorale që i hap rrugë zgjedhjeve të lira e të ndershme.

PPE, pjesë e së cilës është dhe Partia Demokratike,  hartoi 10 pika me rekomandime dhe detyra për Shqipërinë për një demokraci funksionale, duke e vënë theksin tek standardet themelore të demokracisë: zgjedhjet e lira e të ndershme dhe drejtësia e pavarur.

Rekomandimet e PPE-së bazohen mbi rekomandimet që ka dhënë më parë OSBE/ODIHR për zgjedhjet dhe Këshillit Europian për nevojën për reformimin e vendit.

Exit sjell në mënyrë të përmbledhur 10 pikat e rezolutës së PPE-së për Shqipërinë:

1. Nxit shumicën dhe opozitën të dialogojnë për të tejkaluar menjëherë këtë krizë të thellë politike;

2. Nxit hartimin e një reforme elektorale në përputhje me rekomandimet e OSBE-ODIHR që shtron rrugën drejt zgjedhjeve të lira dhe të ndershme;

3. Nxit zbatimin e reformës elektorale, në dobi të demokracisë dhe të funksionimit të institucioneve demokratike qendrore dhe lokale në Shqipëri;

4. Shpreh nevojën urgjente që Shqipëria të sigurojë funksionimin e duhur të Gjykatës Kushtetutese, që më pas do të vendosë për legjitimitetin e zgjedhjeve vendore të 30 qershorit, dhe Gjykatës së Lartë;

5. Nxit hetimin e zyrtarëve të lartë dhe kujtdo që është përfshirë në blerjen e votave, krime elektorale dhe ka lehtësuar përfshirjen e krimit të organizuar në zgjedhje;

6. Nxit largimin e personave me rekorde kriminale që kandidohen për poste në institucione apo emërohen si funksionarë publikë në shkelje të hapur të Ligjit të Dekriminalizimit;

7. Nxit Shqipërinë që të ngrejë Strukturën e specializuar për të luftuar korrupsionin dhe krimin e organizuar dhe hetimin e gjyqtarëve dhe prokurorëve që janë akuzuar për vepra të ndëshkueshme nga procesi i vetingut;

8. Nxit luftën kundër trafikut të lëndëve narkotike, krimit të organizuar dhe pastrimit të parave;

9. Bën thirrje për progres të prekshëm në reformën e administratës publike, si një nga çështjet kyçe për Shqipërinë në rrugën e saj për integrimin në BE;

10. Mbështet Partinë Demokratike të Shqipërisë në përpjekjet e saj për të adresuar shqetësimet legjitime dhe aspiratën Europiane të popullit Shqiptar.

1 koment

    Adresa juaj e emailit nuk do bëhet publike.

    Lajme te ngjashme