Pas PDK-së, edhe këshilltari kryesor i Presidentit Thaçi, Bekim Çollaku ka kritikuar strategjinë e kryeministrit Hoti për bisedimet me Serbinë, rinisur në Bruksel, në 16 korrik.
Sipas Çollakut, Hoti ka lejuar rinisjen e dialogut në nivel teknik, siç i intereson Serbisë, dhe jo në nivelin politik, siç është në interesin e Kosovës.
Në një postim në Twitter, Çollaku shkruan:
“Rinisja e dialogut teknik të udhëhequr nga BE-ja nuk është në interesin e Kosovës.
Ai është dizajnuar për të justifikuar hapjen e më shumë kapitujve për pranimin e Serbisë në BE, teksa e lë Kosovën të izoluar dhe në status quo.
Qëllimi duhet të jetë marrëveshja përfundimtare politike me njohje reciproke.”
Deklarata e Çollakut vjen pas njoftimit nga vetë Hoti se në takimin me presidentin serb Vuçiç u bisedua për çështjen e personave të zhdukur dhe për ekonominë, si dhe njoftimit se dy ekipet teknike të vendeve do të takohet në 22 korrik për të diskutuar detajet teknike.
Më herët dhe PDK-ja e kritikoi qasjen e Hotit në bisedime.
Deputeti i PDK-së Enver Hoxhaj tha se qeveria e Hotit ende nuk ka një strategji dhe platformë për bisedimet ndaj pjesëmarrja e Hotit në takim ka qenë e nxituar.
