Presidenti serb Aleksandar Vuçiç deklaroi dje se nëse NATO nuk do të mbrojë popullsinë serbe në veri të Kosovës dhe Metohi – emri serb për Rrafshin e Dukagjinit,- atëherë vetë Serbia do t’i mbrojë ata.
I pranishëm në një aktivitet me rastin e 15-vjetorit të masakrave kundër serbëve në Kosovë, Vuçiç tha se masakra u zhvillua me mbështetjen e ndërkombëtarëve.
Presidenti Vuçiç akuzoi NATO-n se nuk po e kryen detyrën e saj për të mbrojtur qytetarët:
“Sa i përket Serbisë, ajo do të mbrojë popullin e saj në Kosovë dhe Metohi, nëse ata që kanë për detyrë ta bëjnë këtë, nuk e bëjnë këtë. Më duket se NATO nuk e kupton mirë rolin e tij që puna e tyre është në përputhje me Rezolutën 1244 të Këshillit të Sigurimit të OKB-së për të mbrojtur popullin tonë në çdo vend, në Kosovë dhe Metohi.”
Lidhur me bisedimet me Kosovë, Vuçiç tha se Serbia ka dërguar mesazh të qartë se është e gatshme të bisedojë dhe bashkëpunojë me Kosovën por se me vendimet e qeverisë kosovare për të vënë tarifa ndaj Serbisë nuk tregojnë të njëjtën gatishmëri nga Kosova.
“Ne besojmë se arritja e një kompromisi [mes Serbisë dhe Kosovës] është më e mira. Nëse dikush nuk dëshiron kompromis, ata duhet ta thonë këtë gjë në mënyrë të qartë dhe të hapur. Serbia do të jetë gjithmonë e gatshme për bisedime dhe dialog, por është mjaft e vendosur për të mbrojtur interesat e popullit të saj.”
