Pse Lulzim Basha po gabon me sjelljen ndaj partive të reja

Nga Ermal Mulosmani
Pse Lulzim Basha po gabon me sjelljen ndaj partive të reja

Krijimi i partive të reja nga ish eksponentë të Partisë Demokratike, ka krijuar një reagim plot ironi e mllef në mes përkrahësve të Partisë Demokratike. Kjo sjellje buron kryesisht nga qëndrimet armiqësore të mbajtura nga liderët e këtyre partive, Topalli, Patozi, Murrizi apo Hajdari ndaj liderit të Partisë Demokratike, Lulzim Basha edhe nga koha e zgjedhur për krijimin e tyre.

Në një analizë të ftohtë, mendoj se PD e ka gabim këtë qëndrim. E para askush nuk ka të drejtë të paragjykojë të drejtën kushtetuese të organizimit të individëve në një parti politike.

E dyta dhe kryesorja, këto sulme shkojnë kryekëput kundër interesave elektorale të Partisë Demokratike.

Çdo votues anti-Rama, që, për çfarëdolloj arsyeje, nuk është i interesuar për të votuar as Bashën e as LSI-në, është  praktikisht një bojkotues i 25 Prillit. Bojkotuesit në vetvete i shërbejnë pa dashjen e tyre, ruajtjes së gjendjes ekzistuese, pra pushtetit. Këta votues mundet t’i thithë për arsye lokale, tribale apo edhe ideologjike njëra prej këtyre partive. Fjala vjen, një numër i konsiderueshëm i votuesve të Shkodrës, Lushnjës, Kavajës ose Tiranës mund të votojnë Topallin, Patozin apo Murrizin e Hajdarin.

Atëherë pse PD duhet të sillet armiqësisht ndaj këtyre votuesve të djathtë që nesër mund të jenë aleatët e tyre? Pse do i çojë ata në kampin e Ramës me sjelljen e tyre linçuese në publik? Po sikur ato parti, në rast të një koalicioni të përbashkët mes veti, të marrin 2, 3 ose më shumë deputetë, çfarë do bëjë Lulzim Basha? Çfarë të keqe ka nëse përshëndetet krijimi i këtyre Partive dhe u bëhet thirrje të bashkohen para ose pas zgjedhjesh me PD-në?

Sali Berisha ka qenë mjeshtri më i madh i krijimit të koalicioneve. Ai ka arritur të rrijë në pushtet pikërisht duke kaluar mbi çdo mëri personale dhe duke grumbulluar çdo grusht votash në anën e tij. Sidomos në prag të zgjedhjeve. Ka qenë e vetmja mënyrë për të ardhur në pushtet në kushtet kur kundërshtari ka pasur historikisht një elektorat më të madh. Kjo duhet të jetë në vëmendjen e Lulzim Bashës.

“Një pakicë e bashkuar fiton kundër një shumice të ndarë”,  ka qenë sllogani i padeklaruar i Berishës, çelësi i suksesit politik të tij.  Tashmë, këtë mësim të vyer poltik është koha për t’ia mësuar Bashës.

Krijimi i një partie politike nga Patozi, Topalli e të tjerët duhej të ishte një lajm i mirë për Bashën. Kundërshtarët kryesorë, ata të cilët kishin hije më të rëndë se vetë Basha në Partinë Demokratike të 2013-ës, përfundimisht janë jashtë PD-së, rreziku i tyre ndaj karriges së Bashës është zero. Ata nuk mund të dalin nga politika sepse kështu e vendos Basha, ata kanë të drejtë të vazhdojnë karrierat e tyre pavarësisht tij. Kjo është e drejtë elementare.

I takon Bashës që t’i përshëndesë e t’i afrojë, tashmë rreziku që buronte prej tyre ka kaluar. Ironikisht, me një sjellje të tillë afruese, këta kundërshtarë mund të jenë aleatët e nesërm të tij, mund të jenë votat e domosdoshme të një koalicioni anti-Rama.

Sjelljet e Astrit Patozit kanë qenë mjaft korrekte këto kohë. Ai ka qenë i vetmi që ka deklaruar futjen në zgjedhje me sistemin e listave të hapura, sot i kishte bërë thirrje të gjitha Partive jashtë bllokut PD-PS-LSI të bashkohen në një koalicion të përbashkët. Ky është edhe veprmi i duhur në kushtet e një votimi rajonal, bashkimi i forcave për të maksimalizuar votën.

Kjo sjellje e tillë konfliktuale, plot konspiracion e mllef, mundet që t’i bëjë shumë nder këtyre partive dhe shumë dëm Partisë Demokratike.  Lulzim Basha ka një aleat natyror më shumë te Jozefina e Patozi sesa te secila prej Partive tjera në çdo anë të spektrit politik.

Është koha për të maksimizuar votat, për të bashkuar qëndrimet. Fokusi duhet të jetë Rama, vetëm ai.

Të gjithë tjerët janë aleatë të mundshëm.

2 komente

  1. ghg 29 Tetor, 2020 në 4:33 pm

    Problemi është se koalicionet me ligjin e ri janë të ndaluara.
    Shto dhe faktin që kanë krijuar shumë parti dhe nuk janë bashkuar në një ku fare mirë mund të garonte secili në qarkun e vet pa konkuruar njëri tjetrin, tregon që synojnë thjesht ti heqin mjaftueshëm vota opozitës aty ku kanë influence.
    Le të jemi realist, me sistemin aktual elektoral, vërtet mendoni se me forcat e tyre dhe të ndarë në shumë parti do arrijnë të nxjerrin deputetë?

    Ngelet që kryetarët e këtyre partive ti vendosin në listë të përbashkët me PD. Si do e presi baza e saj? Do përtypi që Jozefina doli disa ditë para zgjedhjeve të 2017 me thirrje për të mos votuar PD? Apo Astritin që legjitimoi zgjedhjet lokale të 2019? Apo Murrizin me Rudinen që po mbajnë në këmbë këtë parlament gjysmak me gjoja opozitë?
    Në analizë të ftohtë, listë e përbashkët me kryetarët e këtyre partive, do humbiste më shumë vota se çdo të fitonte, pasi baza është më pak pragmatiste se kryesia, ende nuk e ka përtypur koalicionin me LSI, e leje pastaj të duroj brrylat e ish-anëtarëve qejfmbetur të kryesise të cilët kanë vite që janë shkëputur nga hallet e njerzëve të thjeshtë.

    E vetmja zgjidhje që Shqiperia të shpëtoj nga Edi Rama dhe sekti i tij neo-bllokmen (alias soros, rilindja, ps, ppsh, etj) është që të bashkohen në një koalicion të përbashkët anti-kartel të PD me LSI dhe të gjitha partite e djathta e të majta që duan ta shpëtojnë vendin nga kjo zgjedhë.
    Por fatkeqësisht gjasat janë që do hyjne në zgjedhje të ndarë, dhe Edi Rama do përpiqet të dali parti e parë dhe të blejë deputëte mjaftueshëm për të ndenjur në këmbë.

    Ngelet në dorë të popullit, a do jetë në gjëndje të bëj llogari pragmatike për të ardhmen dhe analize të ftohtë shkak-pasoje që të votojë me mënd në kokë.

  2. I paemer 30 Tetor, 2020 në 11:10 pm

    Analiza e Mulosmanit eshte shume e sakte ne cdo pike per mendimin tim. Sa per problemin e koalicioneve, sidomos ndermjet ketyre partive te vogla, nuk duket problem i pakapercyeshem. Nese keta garojne nen nje sigel dhe ne krye te listave rajonale vendosen Topalli ne Shkoder, Patozi me Kavaje, Murrizi ne Lushnje etj, keto parti kane mundesi qe minimumi te cojne 4-5 deputete ne Kuvend. Mendoj se Topalli ka reputacion te mjaftueshem ne Shkoder, Murrizi ne Lushnje dhe ndoshta edhe Patozi ne Kavaje pa llogaritur edhe te tjere si Kulluri me shoke, qe te mbledhin minimalisht 50 mije vota nga ato votat e elektoratit gri. Keta po sulmohen ne menyre shume te padrejte nga PD dhe nga nje frike e pashpjegueshme se do t’i heqin vota, nderkohe qe PD nuk ka ku bie me poshte se numri i votave te 2017-es. Keta do marrin kryesisht vota te djathta te njerezve qe nuk do shkonin te votonin. Pra do te ishte ne te mire te vete PD qe keto parti pas zgjedhjeve te benin aleance me te. Sulmet qe po behen ndaj tyre, tregojne nivelin e ulet te atyre qe vetequhen demokrate

Adresa juaj e emailit nuk do bëhet publike.

Lajme te ngjashme