Qeveria e Kosovës, gjatë mbledhjes të së martës, i hapi rrugë miratimit të një projekt-ligji për konfiskimin e pasurisë së pajustifikueshme, raporton Radio Europa e Lirë.
Ministrja e Drejtësisë, Albulena Haxhiu tha se projektligji mundëson konfiskimin e pasurisë së pajustifikuar të personave të dyshuar, edhe pa një vendim të prerë të gjykatës.
“Inicimi dhe konfiskimi i pasurisë së pajustifikueshme i bën më efikase institucionet përkatëse në konfiskim të pasurisë sepse nuk kërkohet siç përcaktohet me legjislacionin aktual, që një herë duhet të dënohet personi me aktgjykim dënues e pastaj të fillojë procedura e konfiskimit ndaj tij”, tha Haxhiu.
Aktualisht, ligjet në Kosovë lejojnë vetëm sekuestrimin e përkohshëm të pasurisë, në mungesë të një vendimi të prerë të gjykatës.
Kjo bën që procesi të zgjatet dhe sistemi ligjor të jetë i padobishëm, shtoi ajo.
Haxhiu njoftoi njëkohësisht edhe krijimin e një agjensie të pavarur, që do të merret me procedurat e konfiskimit ndaj personave që dyshohet se kanë përfituar pasuri të pajustifikuar apo të paligjshme.
Aktualisht, asetet e konfiskuara administrohen nga Agjensia për Administrimin e Pasurisë së Konfiskuar dhe Sekuestruar.
Vitin a kaluar ajo mori nën adminsitrim rreth 1.6 milion euro në asetetë sekuestruara apo konfiskuara, ndërkohë që qysh nga themelimi ka administruar rreth 40 milionë euro.
