Pohimet dhe kronikat publike të qeverisë për kontrollin e pasagjerëve që vinë nga Italia duket se është propagandë. Në të vërtetë, kontrollet në Rinas duket se nuk bëhen ose bëhen shkel e shko.
Një qytetare i ka dërguar Exit News një filmim të kalimit të saj në Rinas, pasi ka mbërritur nga Bolonja rreth orës 23:00 të mbrëmjes së të hënës, ku duket se as ajo dhe asnjë nga udhëtarët nuk i është nënshtruar ndonjë kontrolli mjekësor.
Në video duket se, megjithëse ka një person me aparaturë temperature në dorë, pranë pikës së kontrollit të pashaportave, ai nuk i kontrollon pasagjerët.
Exit News ka verifikuar të dhënat e videos dhe ato rezultojnë të vërteta: të paktën për pasagjerët e linjës Bolonja-Tiranë nuk është ushtruar asnjë kontroll mjekësor gjatë hyrjes në territorin shqiptar.
Ndërkohë, propaganda zyrtare siguron që në Rinas kryhen kontrolle të rrepta. Lorenc Harshova, Shef i Njësisë së Inspektimit Shëndetesor Rinas, deklaroi dje, më 24 shkurt se sipas protokollit të ministrisë duhet të kontrollohen për temperaturë dhe të intervistohen të gjithë pasagjerët që vijnë nga Italia:
“Që pardje në darkë ne kemi filluar check-imin e të gjithë pasagjerëve nga Italia. Vetëm dje i është matur temperatura mbi 3237 pasagjerë.”
Sot, më 25 shkurt, Eugena Tomini, Drejtuese e Shërbimit të Inteligjencës Epidemike, deklaroi:
“Çdo linjë e ardhur nga Italia monitorohet. Udhëtarët që janë evidentuar dhe vlerësuar në pikat kufitare kanë marrë rekomandimin e duhur.
Këto deklarime janë të pavërteta dhe qeveria duhet të reagojë menjëherë pasi neglizhenca mund të jetë me pasoja.”
