Qeveria shqiptare në 19 mars shpalli se 16 milion euro do të shkonin për të gjithë qytetarët në nevojë. Fill pas saj Ministria e Mbrojtjes dha një tender të nxituar dhe më pas shpërndau ndihma që tashmë ekzistonin në rezervën e shtetit. Përfituesit ishin më pak se 200,000.
Kryeministri Rama njoftoi se më shumë se 400,000 individë dhe familje kishin përfituar nga ndihma shtetërore.
Ndërkohë Ministria e Mbrojtjes i ka thënë Rrjetit Investigativ Ballkanik një tjetër shifër, që arrin gjysmën e asaj të Kryeministrit.
Më shumë donacione, sesa ndihmë shtetërore
BIRN pas llogaritjeve të saj sugjeron një tjetër shifër – janë 173,000 përfituesit nga pakot me ushqime – të cilat erdhën kryesisht nga donacione private apo të shoqatave të bamirësisë dhe jo nga qeveria shqiptare.
Nga këto 173,000 pako ushqimore:
– Rreth 74,000 janë shpërndarë nga bashkitë
– 63,000 pako të dhuruara nga shoqata, biznese dhe individë
– 29,000 pako janë shpërndarë nga rezervat e shtetit
Një zyrtar i Ministrisë së Mbrojtjes justifikoi mos përputhjen e shifrave të Ministrisë me ato të Kryeministrit, me argumentin se ky i fundit llogarit si ndihma edhe paketat e ushqimeve të paguara, dhurimet nga bizneset private dhe organizatat e bamirësisë.
Gjithashtu, pakot e shpërndara nga Bashkitë konsiderohen si të qeverisë, pasi fondi për to ka ardhur nga buxheti i shtetit, shton zyrtari i ministrisë i cili nuk ka dashur të publikohet emri i tij.
BIRN ushtroi të drejtën e lirisë së informacionit dhe pasi përllogariti të dhënat nga 12 prefektura, rezultoi se ndihma që qeveria ka dhënë për qytetarët nga arka e shtetit përbën vetëm 12% të ndihmave totale të shpërndara nga Ministria e Mbrojtjes dhe 11% e asaj që është raportuar nga Bashkitë.
Donacionet kishin një vlerë shumë më të lartë se kaq.
Tender urgjent, me rezervat tashmë plot
Ndihmat ushqimore të shpërndara nga qeveria u morën nga rezervat e shtetit, ku sipas inventarit të muajit mars 2020 që BIRN e ka parë, kishte:
400 ton miell – 80 ton oriz – 80 ton sheqer – 70 ton makarona – 50 ton vaj – 50 ton fasule – 20 ton mish të konservuar – 5 ton kripë – 30 ton pastrues – 30,000 copa sapun
Pavarësisht kësaj, pas miratimit të programit të ndihmës nga qeveria në 19 mars, Ministria e Mbrojtjes dha një tender të nxituar me vlerë 105.7 milion lekë për blerjen e rezervave ushqimore.
Kompania Maqedonase që fitoi tenderin, Eurovia dorëzoi 30,000 pako ushqimore që ushtria i ruajti, raporton BIRN.
Tenderi i ushqimeve i dhënë për kompaninë Eurovia po hetohet nga Prokuroria Speciale Antikorrupsion.
