Kontrolli i Lartë i Shtetit dorëzoi të hënën në Kuvend raportin vjetor për vitin 2020.
Auditimi nga KLSH ka për qëllim shqyrtimin e performancës financiare të institucioneve.
Kjo arrihet përmes analizimit të tre përbërësve: programimi i buxhetit të shtetit, ekzekutimi i tij dhe raportimi i treguesve fiskalë.
Ne këtë mënyrë KLSH arrin të nxjerrë dëmin ekonomik ndaj buxhetit.
Ky i fundit llogaritet si rezultat i shkeljeve financiare të konstatuara dhe si rezultat i efekteve negative të këtyre shkeljeve.
Nga raporti i KLSH për vitin 2020, dëmi ekonomik nga parregullsitë dhe shkeljet financiare rezulton në shumën 2,193,692 mijë lekë.
Ndërsa, dëmi i ardhur si pasojë e parregullsive apoel paligjshmërive, rezulton në vlerën 85,867,279 mijë lekë.
Pasojat negative zakonisht i referohen përdorimit jo eficent të fondeve dhe mungesës së kontrollit në prokurimet publik.
Në total, KLSH llogarit se institucionet kanë shkaktuar një dëm prej 88 060 971 lekë ndaj financave publike për vitin 2020.
Parregullsitë më të mëdha vërehen në lidhje me “administrimin e të ardhurave tatimore dhe jo tatimore; menaxhimin jo të kujdesshëm në procesin e përdorimit të fondeve publike; keqadministrimin e pronës shtetërore ndjekur nga paligjshmëritë procedurale dhe ineficencat në realizimin e procedurave të prokurimit publik.”
KLSH raporton se ka bërë 8 kallëzime dhe indicie penale për shkeljet e konstatuara.
Prej tyre, 5 raste i janë dërguar prokurorisë si indicie penale, 1 si kallëzim penal dhe 2 për vlerësim të elementëve të mundshëm të veprës penale.
Në raport theksohen edhe parregullsitë në procedurat e prokurimit, ku:
– 33% e tyre rezultojnë me një ofertues të vetëm;
– prokurimet janë të përqëndruara në institucione dhe ente publike, të cilat kanë konsumuar 96% të fondit limit;
– pjesa më e madhe e tyre janë të përqëndruara në Tiranë;
– volumi i madh i ankesave nga operatorët ekonomik shihet si tregues i mungesës së besimit në procesin e prokurimeve.
Një tjetër shqetësim i KLSH-së është mungesa e raportimit apo raportimi i pjesshëm i detyrimeve të prapambetura të institucioneve.
Këtu përfshihen detyrimet nga vendimet gjyqësore ndërkombëtare apo mungesa e raportimit të stokut të rimbursimit të TVSH-së nga Drejtoria e Tatimeve në Ministrinë e Financave dhe Ekonomisë.
