Peter Beyer, raportuesi për Kosovën në Këshillin e Evropës i ka kërkuar politikanëve kosovarë të jenë të përgjegjshëm dhe të kenë respekt për sundimin e ligjit në vend.
Në një deklaratë të lëshuar mëngjesin e 5 majit, Beyer shkruan se Kosova është goditur fort nga pandemia e COVID-19, por se është thelbësore për të ardhmen e vendit që sistemet e kontrollit dhe balancës mes institucioneve kryesore të jenë të sigurta dhe të mbështetura në ligj e kushtetutë:
“Në këtë situatë dramatike, është thelbësore për të ardhmen e Kosovës dhe popullit të saj që sistemet e kontrollit dhe balancës të jenë të forta dhe të sigurta. Kjo vlen veçanërisht për një kuvend plotësisht funksional dhe një sistem të pavarur gjyqësor kushtetues.”
Ai u bëri thirrje politikanëve kosovarë dhe pjestarëve të sistemit gjyqësor që të veprojnë duke pasur parasysh interesin e qytetarëve dhe çdo vendim i tyre të jetë në përputhje me Kushtetutën e Kosovës.
Beyer shpreson se liderët e Kosovës janë të udhëhequr vetëm nga sundimi i ligjit dhe se do të sigurojnë parimin e proporcionalitetit në lidhje me të gjitha masat që konsiderohen të nevojshme për të përballuar krizën aktuale pandemike dhe politike. Ai u bëri thirrje palëve të përfshira të respektojnë Konventën Evropiane për të Drejtat e Njeriut, të cilat janë pjesë e sistemit juridik të brendshëm të Kosovës.
Deklarata e raportuesit për Kosovën vjen në një moment delikat për vendin, veçanërisht në aspektin politik, ku pas rrëzimit të qeverisë Kurti, presidenti Thaçi mandatoi Lidhjen Demokratike të Kosovës, partinë e dytë të zgjedhje, për të formuar qeverinë e re.
Ky vendim i Thaçit po shqyrtohet nga Gjykata Kushtetuese nëse është i ligjshëm dhe në përputhje me Kushtetutën apo jo.
Deri në formimin e qeverisë së re, kryeministri Kurti dhe qeveria e tij do të vazhdojnë të qëndrojnë në detyrë.
