Gazetarja britanike Alice Taylor ka paditur në Gjykatën Administrative Drejtorinë e Migracionit, pasi kjo e fundit nuk i ka rinovuar lejen e qëndrimit në Shqipëri.
Sot u zhvillua seanca e pare, ku të dyja palët kanë paraqitur pretendimet përkatëse.
Që prej shkurtit 2019 gazetarja britanike po qëndron në mënyrë të paligjshme në Shqipëri.
Në shkurt ajo bëri një kërkesë për rinovimin e lejes së qëndrimit në Drejtorinë e Migracionit dhe në mars mori përgjigjen se kërkesa e saj është aprovuar. Ajo aplikoi disa ditë me vonesë pasi ishte e shtruar në spital për shkak të ndërlikimeve me shtatzaninë, një fakt që ishte pranuar nga Drejtori i Migracionit dhe deri në ato momente nuk ishte bërë pengesë për rinovimin e lejes.
Disa ditë më vonë, një prej mediave më pranë qeverisë nisi një fushatë lincimi kundër gazetares Taylor, ku e akuzonte atë si “spiune rus”, ndërsa partnerin e saj si “kriminel në kërkim” dhe “militant të dhunshëm”. Sulmi erdhi pas një sërë shkrimesh nga Taylor për protestat kundër qeverisë, përgjimeve që tregonin përfshirjen e qeverisë në manipulimin e zgjedhjeve dhe lidhjet e saj me krimin e organizuar.
Pas kësaj, ajo mori një telefonatë për ta njoftuar atë se miratimi i lejes së saj ishte revokuar “me urdhër nga lart”.
Gazetarja mori gjobë dhe iu kërkua që të largohej nga Shqipëria dhe të niste aplikimin nga e para pavarësisht se ishte gjashtë muaj shtatzënë. Për rreth dy javë autoritetet refuzuan t’i jepnin asaj një shpjegim zyrtar për refuzimin e lejes së qëndrimit duke publikuar në media informacione konfidenciale të saj dhe duke deklaruar se ajo ishte në shkelje të ligjit.
Avokati i Popullit hetoi rastin dhe dha rekomandimin që gjobat dhe kufizimet e vendosura për Taylor nuk ishin në përputhje me ligjin dhe se ato duhet të hiqen dhe leja e saj të lëshohej brenda 30 ditëve. Por policia zgjodhi të injorojë këtë rekomandim, ndaj Taylor filloi procedurat në Gjykatën Administrative.
Në seancën e sotme u bëmë veprimet paraprake: prezantimi i palëve dhe legjitimimi i tyre. Seanca e radhës do të mbahet më 9 tetor.
