Shoqata “Drejtësi për Drejtësinë” ka kallëzuar në SPAkK anëtaren e KPK-së Brunilda Bekteshin, për deklarim të rremë pasurie, bazuar në disa informacione të publikuar në disa portale.
Shoqata “Drejtësi për Drejtësinë” e krijuar nga gjyqtarë dhe prokurorë të shkarkuar nga Vetingu, drejtohet nga ish-prokurori Gentian Trenova.
Anëtarët e shoqatës mendojnë që vendimet për largimin e tyre nga sistemi janë të padrejta. Ata më 9 qershor i janë drejtuar Avokatit të Popullit që të verifikojë procedurën e përzgjedhjes dhe dokumentacionin, që kanë dorëzuar komisionerët e të dy shkallëve të Vettingut.
Sipas shoqatës, disa nga komisionerët e KPK dhe KPA nuk plotësojnë kriterin kryesor atë të përvojës se punës jo më pak se 15 vjet si gjyqtar, prokuror, avokat, profesor i së drejtës, nëpunës i shërbimit civil në nivel drejtues ose në një përvojë të njohur në fushën e së drejtës administrative ose sfera të tjera të së drejtës.
