Përdhunimi ndodhi dy ditë më parë në kryeqytetin e Kosovës dhe ministri i Brendshëm Xhelal Svecla bëri të ditur se të gjithë të dyshuarit, bari një, aktualisht janë në arrest dhe në paraburgim.
“Kam marrë me shqetësim lajmin për përdhunimin e një vajze të mitur, 11-vjeçare, nga pesë persona për disa orë rresht. Jam i vetëdijshëm për shqetësimin legjitim të çdo prindi dhe çdo vajze në vendin tonë. Kam kërkuar angazhim të plotë nga Policia e Kosovës për arrestimin sa më të shpejtë të të gjithë autorëve të këtij akti makabër”, tha Svecla.
Presidentja Vjosa Osmani e cilësoi ngjarjen si një “akt tronditës dhe çnjerëzor”, ndërsa kërkoi “hetim rigoroz dhe përgjegjësi para ligjit për autorët”.
Dhuna seksuale, si dhe të gjitha format e dhunës ndaj vajzave dhe grave, përbëjnë kërcënim për të gjithë, tha Osmani, duke shtuar se “Është koha që të vazhdohet edhe me ndryshime legjislative që ashpërsojnë edhe më shumë dënimet për dhunuesit. Përgjegjësia jonë kolektive është të sigurojmë që të gjithë fëmijëve t’u garantohet një fëmijëri dinjitoze dhe të eliminojmë dhunën me bazë gjinore.”
Kryeministri i Kosovës, Albin Kurti, ka kërkuar dënimin e merituar për dhunuesit e 11-vjeçares.
“I kërkoj organeve të rendit dhe hetimit që të dyshuarit t’i nxjerrin para drejtësisë sa më shpejt dhe autorët të marrin dënimin e merituar për këtë krim të rëndë dhe tronditës, të dënueshëm dhe të papranueshëm. Aktet e tilla brutale të dhunës ndaj fëmijëve duhet të trajtohen me seriozitet të lartë, në nivel institucional dhe social e kulturor”, tha Kurti në rrjetet sociale.
Rrjeti i Grave të Kosovës shprehu shqetësimin e saj për këtë ngjarje duke bërë thirrje që të dyshuarit “pas vlerësimit të provave të marrin dënimin e merituar sipas peshës së krimit”.
Në Kosovë përdhunimi dënohet nga dy deri në dhjetë vjet, ndërsa në rastin e të miturit dënimi është nga pesë deri në 20 vjet. Sipas Rrjetit të Grave të Kosovës, mbi 70% e të gjitha rasteve të sulmeve seksuale dhe përdhunimeve në vend përfshijnë vajza të mitura.
Zëvendësministrja e Drejtësisë në Kosovë, Nita Shala, duke vlerësuar përdhunimin tronditës të të miturës, ka bërë të ditur se paraditen e së martës do të mblidhet urgjentisht Grupi për Reagim Emergjent.
Sipas një raporti të publikuar më herët gjatë vitit nga misioni EULEX në Kosovë, vërehet se numri i rasteve të përdhunimeve të raportuara në policinë e Kosovës është dyfishuar ndërsa shkalla e dënimeve mbetet shqetësuese e ulët.
EULEX-i raportoi se në dy vjet, kishte 228 raportime për përdhunim. Shumica dërrmuese, mbi 90% e përdhunimeve, besohet se nuk raportohen, që do të thotë se numri aktual besohet të jetë shumë më i lartë.
Fatkeqësisht, disa media e kanë raportuar ngjarjen si “seks i padëshiruar” ose “seks i detyruar”, kur termi i saktë është në fakt, përdhunim.
Ky artikull është realizuar me mbështetjen financiare të Bashkimit Evropian, në kuadër të Projektit “Reporting Diversity Network 2.0”, nën skemën e mbështetjes së granteve të vogla.
Përmbajtja e tij është përgjegjësi e vetme e “New Policy Group” dhe, si e tillë, nuk pasqyron domosdoshmërisht pikëpamjet e Bashkimit Evropian apo të Rrjetit të Raportimit të Diversitetit 2.0.
