Shefja e sëmundjeve infektive në Institutin e Shëndetit Publik, Silva Bino, tha në një intervistë për TV A2 se Shqipëria do të jetë e hapur ndaj vaksinës AstraZeneca.
Të shtunën, deklaroi ajo, fillon vaksinimi i mësuesve siç ishte parashikuar
Bino tha se nuk ka të dhëna shkencore që humbjet e jetës dhe trombozat e shkaktuara në persona në shtete të ndryshme, të kenë lidhje me injekimin e vaksinës.
“Janë 5 milion doza që janë aplikuar deri tani në vendet e BE dhe vetem 20n raste me këtë patologji, që këto vende e kanë bllokuar pasi po e studiojnë,” u shpreh ajo.
Janë mbi 38 mijë doza të AstraZeneca-s, që vijnë nga Suedia dhe kontigjenti i tyre është i ndryshëm nga ai i bllokuar në Austri e Itali.
Shqipëria do ta aplikojë vaksinën AstraZeneca edhe te moshat mbi 65 vjeç, pasi vendet që e kundërshtuan janë tërhequr nga vendimi, informoi Bino.
Ashtu si edhe më herët Bino mbështet edhe aplikimin e vaksinës ruse dhe kineze, që sipas saj kanë dhënë rezultate mjaft të mira në mbrojtjen ndaj COVID-19.
Deklarata e Silva Binos vjen në një moment kur edhe OBSH njoftoi se rastet e mpiksjes së gjakut nuk kanë lidhje me vaksinën dhe nuk kishte arsye përse AstraZeneca të mos përdorej.
