Prokurorët e Gjykatës Speciale Kundër Korrupsionit dhe Krimit të Organizuar (SPAK) po përpiqen të kthejnë në dëshmitarë ata që akuzohen për bashkëpunim në skandalin e tenderit të uniformës së policisë.
Euronews ka raportuar se prokurorët po përpiqen të kthejnë dy nga ata që akuzohen për ‘shkelje të barazisë së tenderit”, në bashkëpunëtorë të drejtësisë për të hedhur më shumë dritë mbi të tjerët të përfshirë në marrëveshje. Konkretisht, cilët ishin udhëheqësit dhe nëse ishte përfshirë ndonjë zyrtar tjetër i lartë.
Ish-kreu i Prokurimit Publik në Ministrinë e Brendshme dhe disa anëtarë të komitetit për vlerësimin e ofertave në Agjencinë e Prokurimit Publik ishin midis të arrestuarve.
Ata u hetuan dhe më vonë u arrestuan për abuzime në lidhje me një tender prej 23 milionë eurosh për furnizimin e policëve shqiptarë me uniforma deri në vitin 2023.
Drejtoria e Përgjithshme e Policisë lëshoi një kërkesë për propozime në 2019 dhe i dha kontratën një konsorciumi ndërmarrjesh në prill 2020.
Në gusht të vitit 2020, një grup parlamentar i opozitës denoncoi tenderin në SPAK, duke akuzuar disa zyrtarë për “shpërdorim detyre” – përfshi ministrin e Brendshëm të asaj kohe Sandër Lleshaj – dhe duke pretenduar se fituesi ishte zgjedhur paraprakisht, megjithëse nuk i përmbushte kërkesat.
Deri më sot, nëntë zyrtarë dhe ish-zyrtarë janë arrestuar. Ish-ministri Lleshaj tha se nuk kishte të bënte me këtë çështje dhe se kishte ngritur vetë alarmin në lidhje me të vitin e kaluar.
