Të gjithë detajet si do të organizohet mësimi në një shkollë të mesme në Tiranë

Nga Exit News
Të gjithë detajet si do të organizohet mësimi në një shkollë të mesme në Tiranë

Pas rekomandimit të Ministrisë së Arsimit për zhvillimin e mësimit me disa turne, shkollat kanë nisur hartimin e planeve të veçanta, bazuar në numrin e nxënësve dhe klasave që kanë.

Exit News ka siguruar një plan ndarjeje të klasave në një shkollë të mesme me 503 nxënës.

Sipas planit, mësimi do të ndahet me 2 turne dhe orët e mësimit do të jenë 25 minutëshe. Klasat do të kenë nga 15 nxënës dhe do të jenë të shpërndara në të tre katet e godinës.

Për turnin e parë, mësimi do të nisë në orën 08:00 të mëngjesit dhe do të mbarojë në orën 10:55. Ndërsa për turnin e dytë, mësimi do të fillojë në orën 11:15 dhe do të përfundojë në orën 14:10.

Ajo që vihet re nga plani për shkollën është koha e shkurtër e pushimit mes dy turneve.

Koha prej 20 minutash mes dy turneve me shumë gjasa nuk është e mjaftueshme për dezinfektimin dhe pastrimin e të gjithë shkollës dhe bërjes së ambienteve gati për nxënësit e turnit të dytë. Në udhëzimin hartuar nga ministria, theksohej se klasat duhet të dezinfektoheshin pas çdo turni.

Po ashtu, teksa ky plan duket i menduar për një shkollë me 503 nxënës, shumica e shkollave në Tiranë kanë mbi 1000 nxënës secila. Secila klasë ka zakonisht 35 deri në 50 nxënës dhe ndarja e tyre në grupe prej 15 nxënësish do ta dyfishonte ose trefishonte numrin e klasave të nevojshme.

Për këto shkolla ende nuk ka një plan mësimi, të paktën publikisht. Praktikisht, ndarja e këtyre klasave në disa grupe është e pamundur sepse shkollat nuk kanë klasa boshe.

Po ashtu, është ende e paqartë se si do të mbulohet me stafin e nevojshëm të mësuesve për të përballuar shtimin e numrit të klasave dhe orëve të zgjatura të mësimit, veçanërisht për ato shkolla që do të punojnë me më shumë se dy turne.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>