“Vendimi që kemi marrë është që të gjithë objektet e kultit që gjenden në qendrën e Tiranës, si Katedralet, ashtu edhe Xhamia e Namazgjasë, të jenë brenda zonës pedonale” deklaroi dje Kryebashkiaku Erion Veliaj në ditën e Bajramit.
Nëse pohimi i Zotit Veliaj është i vërtetë, zona këmbësore e Tiranës do të përfshijë zonën që fillon në pikën veriore të urës së Rrugës së Elbasanit ku po ndërtohet Xhamia e Namazgjasë, duke u kufizuar nga unaza përfshin Katedralen e Tiranës, vazhdon përmes Bulevardit Dëshmorët e Kombit, për të përfshirë gjithë Parkun Rinia dhe, pastaj, në drejtim të Veriut përfshin gjithë zonën ku ndodhet Ministria e Mbrojtjes dhe Kisha Ortodokse, pastaj gjithë Sheshin Skëndërbej, gjithë zonën pas Pallatit të Kulturës, zonën e Partizanit të Panjohur, përfshi ndërtesën TID, qendrën Toptani që po ndërtohet dhe për t’u mbyllur anash godinës së sesioneve të Kuvendit.
Si dhe herë të tjera, Zoti Veliaj i referohet gjërave që deklaron në publik me “kemi marrë vendim” por në fakt nuk ka ndonjë vendim të bërë publik për këtë gjë.
Është e paqartë nëse:
- Është bërë ndonjë studim për këtë projekt?
- A janë bërë analiza për ndikimin në trafik dhe a janë hartuar zgjidhje?
- A është ai pjesë e draft masterplanit të Tiranës?
- A janë bërë konsultime me qytetarët për këtë projekt?
Me shumë gjasa përgjigjja e pyetjeve të mësipërme është negative. Me shumë gjasa “vendimi” është thjesht urdhër arbitrar verbal i Kryeminsitrit Edi Rama.
