Pasi inkurajoi mbështetësit e tij për të marshuar në Kapitol dhe kritikave në Twitter ndaj Majk Pens, Donald Tramp u ka bërë thirrje mbështetësve të tij të protestojnë në mënyrë paqësore.
“Ju lutemi mbështesni Policinë e Kapitolit dhe Zbatimin e Ligjit. Ata janë me të vërtetë në anën e vendit tonë. Qëndroni të paqtë!”, shkruan Tramp në Twitter.
Reagimi vjen pasi mbështetësit e tij thyen rrethimin e Kapitolit dhe hynë në godinë teksa Kongresi dhe Senati po shqyrtonin rezultatet e zgjedhjeve presidenciale.
Tramp kishte thirrur më parë një protestë në Uashington ku i bëri thirrje protestuesve të marshonin drejt godinës së Kapitolit.
Protestuesit thyen Kapitolin pasi Tramp kritikoi në Twitter Majk Pens që sipas tij anashkaloi vullnetin e votuesve amerikanë duke mos bllokuar çertifikimin e fitores së Joe Biden.
Zv/presidenti në detyrë është shoqëruar jashtë godinës së Kongresit pasi punimet janë ndërprerë. Ai refuzoi kërkesën e Tramp për të mos njohur rezultatin e zgjedhjeve në mbledhjen e sotme.
Nga ana tjetër, kreu i Republikanëve në Senat, Miç MekKonell tha se refuzimi i vullnetit të njerëzve në zgjedhjet presidenciale do t’i bënte dëm të pariparueshëm demokracisë amerikane dhe ftoi anëtarët e Senatit të certifikonin rezultatin.
