Katër gazetarë dhe një karikaturist i gazetës turke opozitare Cumhuriyet u liruan dje nga burgu me vendim të gjykatës së apelit.
Të pestë kishin më shumë se pesë muaj në burg dhe nga gjykata e shkallës së parë u dënuan me 5 vjet burg për “ndihmë dhe forcim të grupeve terroriste, pa qenë anëtarë të ndonjë grupi”.
Gazetarët u akuzuan nga qeveria turke se me anë të lajmeve, opinioneve e karikaturave që botonin në gazetë kanë mbështëtur dhe ndihmuar Lëvizjen e Fetullah Gylenit, të cilën qeveria turke e njeh si organizatoren e grushtit të dështuar të shtetit në 2016-ën, Partinë opozitare të Punëtorëve të Kurdistanit dhe Frontin Ultra të Majtë Revolucionar për Lirinë e Popullit.
Të treja këto grupime qeveria e Erdoganit i ka shpallur grupime terroriste dhe çdokush që është anëtar në to apo i mbështet në mënyra të ndryshme, arrestohet dhe dënohet.
E përditshmja Cumhuriyet, e themeluar që prej vitit 1924, është ndër të pakta gazeta që kritikon qeverisjen e presidentit Erdogan.
Can Dundar, ish-kryeredaktori i gazetës u arratis në Gjermani, pasi gjykata e dënoi atë më burg në vitin 2016, për shkrimin e një artikulli ku tregonte se si Turqia ka furnizuar me armë dhe ka mbështetur grupet islamike në Siri.
Megjithëse lirimi i katër gazetarëve dhe një karikaturisti është lajm i mirë për lirinë e medias në Turqi, rreth 130 gazetarë të tjerë vazhdojnë të jenë ende të burgosur dhe qindra të tjerë shkarkohen çdo ditë nga puna në gazeta e televizone të ndryshme në rast se shkrimet e tyre kritikojnë vendimet e qeverisë së Erdoganit.
