UNICEF dhe OBSH i bëjnë thirrje drejtuesve të shteteve të zbatojnë një strategji për vaksinat

Nga Exit News
UNICEF dhe OBSH i bëjnë thirrje drejtuesve të shteteve të zbatojnë një strategji për vaksinat

UNICEF dhe Organizata Botërore e Shëndetësisë (OBSH) u bën thirrje të enjten drejtuesve të shteteve, të zbatojnë një strategji për vaksinat “e cila do të kufizojë variantet e reja dhe do t’i japë fund pandemisë”.

Drejtoresha Ekzekutive e UNICEF, Henrietta Fore dhe Drejtori i Përgjithshëm i OBSH-së, Dr. Tedros Adhanom Ghebreyesus thanë në një deklaratë të përbashkët se “nga 128 milionë doza vaksinash që janë administruar deri tani, më shumë se treçereku i tyre janë bërë në vetëm 10 shtete që përbëjnë 60% të GDP-së”.

“Punonjësit shëndetësorë kanë qenë në vijën e parë të pandemisë në mjediset me të ardhura më të ulëta dhe të mesme dhe duhet të mbrohen së pari në mënyrë që të mund të na mbrojnë,” thanë ata.

Pothuajse 130 vende, me 2.5 miliardë njerëz, ende nuk kanë marrë  një dozë të vetme të vaksinës Covid-19 deri më tani.

“Kjo strategji vetë-shkatërruese do të kushtonte jetë dhe jetesë, duke i dhënë virusit mundësi të mëtejshme për të shmangur vaksinat dhe do të minonte një rimëkëmbje ekonomike globale”, thanë ata.

Krerët e UNICEF dhe OBSH thanë se vendet pjesëmarrëse të Covax po përgatiten të marrin dhe përdorin vaksina. “Punonjësit shëndetësorë janë trajnuar, sistemet e zinxhirit të ftohtë janë të përgatitur. Ajo që mungon është furnizimi i drejtë i vaksinave,” vazhduan Henrietta dhe Tedros.

Për të filluar shpërndarjen e vaksinave në të gjitha vendet brenda 100 ditëve të para të 2021, ata rekomanduan që qeveritë që kanë vaksinuar punonjësit e tyre shëndetësorë dhe popullatat në rrezik më të lartë të sëmundjes së rëndë, të ndajnë vaksinat përmes Covax në mënyrë që vendet e tjera të bëjnë të njëjtën gjë.

“Ne kemi nevojë për udhëheqje globale për të rritur prodhimin e vaksinave dhe për të arritur barazinë e vaksinave. Covid-19 ka treguar se fatet tona janë të lidhura pazgjidhshmërisht. Pavarësisht nëse ne fitojmë ose humbasim, ne do ta bëjmë atë së bashku,” thanë krerët e UNICEF ​​dhe OBSH.

Adresa juaj e emailit nuk do bëhet publike.

Lajme te ngjashme