Varianti Delta i Covid-19 përbën 20% të infektimeve të reja në Francë.
Lajmin e dha ministri francez i Shëndetësisë, Olivier Véran në një intervistë në një radio lokale, sipas Reuters.
“Varianti Delta tani përbën rreth 20% të rasteve të reja (…)porcion që rritet në përqindje në terma jo absolutë, pasi numri i përgjithshëm i rasteve po zvogëlohet,” u shpreh Veran.
Shifrat e reja janë një rritje prej 10% nga një vlerësim i mëparshëm.
“Varianti Delta gradualisht po bëhet mbizotërues, ashtu siç ndodh në të gjitha vendet në botë, pasi është më ngjitës,” shtoi Veran.
Por, ndryshe nga vendet e tjera si Britania, të cilat për shkak të variantit indian po shohin një dyfishim të rasteve, në Francë përkundrazi vazhdon rënia e infektimeve.
Të hënën Franca regjistroi 509 raste të reja, ndërkohë që mesatarja javore e infeksioneve ra në 1 819 raste. Kjo është shifra më e ulët e regjistruar në 10 muajt e fundit.
Varianti Delta vazhdon të përbëjë shqetësim për vendet evropiane qysh prej muajit të kaluar, pasi ato po përgatiteshin për heqje të plotë të kufizimeve për verën. Tashmë, një pjesë e madhe po shtyjnë lehtësimin e masave, për t’i dhënë kohë rritjes së vaksinimeve.
Sipas një studimi, deri në shtator varianti Delta, i cili ka një shkallë të lartë infektimi, do të bëhet mbizotërues në kontinent në vjeshtë.
