Varianti i ri i Covid-19 i shfaqur për herë të parë në Britani ka arritur edhe në Serbi.
Sipas ekspertëve ky variant është më i transmetueshëm se varianti i vjetër.
Presidenti serb Aleksandër Vuçiç tha se ndjehet i frikësuar por nga ana tjetër shtoi se e rëndësishme është që u zbulua në kohë.
“Shpresojmë se mund ta ndalojmë atë”, tha ai duke shtuar se lloji i ri u soll nga një vajzë nga Londra e cila po përjeton simptoma më të lehta.
Presidenti serb tha se pret që 50,000 njerëz të vaksinohen brenda një dite.
“Është e vërtetë që jam i shqetësuar dhe nuk e fsheh, sepse sot është më e vështirë të marrësh vaksina sesa armë bërthamore. Gjëra të pabesueshme po ndodhin në botë, të cilat pjesërisht i parashikuam”, tha ai
Më tej presidenti serb shtoi se nuk ka vaksina të disponueshme në Malin e Zi, Bosnjë dhe Hercegovinë, Maqedoninë e Veriut ose Kosovë.
Vuçiç u shpreh se Serbia është e para në rajon për sa i përket numrit të vaksinuarve për 100,000 banorë dhe tha se ai pret që Serbia të kapërcejë Danimarkën dhe të jetë “e treta në Evropë në numrin e qytetarëve që janë vaksinuar”.
“Ne jemi në vendin e nëntë në botë, dhe në dy ose tre ditët e ardhshme, ne mund të jemi të gjashtët ose të shtatët. Kjo tregon se kemi pasur një politikë të mençur, dhe jo vetëm në sistemin e kujdesit shëndetësor”, tha ai.
Ai përsëriti se vaksina kineze ishte “më e shtrenjta” dhe se Serbia e bleu atë me një çmim më të lirë falë korrespondencës me presidentin kinez Xi Jinping në tetor, por nuk tregoi sa pagoi Serbia për vaksinat.
