Presidentja e Kosovës Vjosa Osmani tha se “non-papers”, “që kanë përbrenda ide destabilizuese për rajonin tonë e kanë vetëm një burim: Serbinë”.
Ajo tha se është strategji e vjetër e Serbisë, me qëllim që një qasje e tillë të normalizohet e të bëhet pjesë e debatit të përditshëm.
“Prandaj, të mos bijmë në kurthin e tillë. Të kemi besim në aleatët tanë, por mbi të gjitha të kemi besim në vetveten. “Non-papers”, të tillë lëre që refuzohen nga ana jonë, por as nuk do të mund t’i përcaktojnë veprimet tona e as mbarëvajtjen e dialogut”, tha Osmani përmes një postimi në Facebook.
Osmani u shpreh se leximi i kujdesshëm i këtyre “non-papers” dhe idevë që prezantohen aty tregon qartë se kush është hartuesi i vërtetë i këtyre dokumenteve.
Këto non papers përfshijnë ndryshimin e kufijve, krijimin e regjioneve autonome apo pushtetet e treta.
“Asnjë “non-paper”, nuk mund t’i ndryshojë prioritetet e as kërkesat tona të drejta në raport me Serbinë: zbardhja e fatit të të zhdukurve, drejtësia si dhe reparacionet për dëmet e luftës”, tha Osmani.
