Presidenti serb Aleksandar Vuçiç komentoi të mërkurën vendimin e ish-Përfaqësuesit të Lartë të OKB-së në Bosnje, Valentin Inzko për penalizimin e mohimit të gjenocidit serb në Srebrenicë muajin e kaluar.
Ai deklaroi se vendimet në Bosnje dhe Hercegovinë duhet të merren me konsensusin e popujve serb, kroat dhe boshnjak, jo me imponim.
“Ky është thelbi i Marrëveshjes së Dejtonit dhe jo zgjidhjet e imponuara”, citohet Vuçiç në një raportim të Radio Evropa e Lirë.
Komenti erdhi pas një takimi që Vuçiç pati me presindetin e Republika Srpska në Bosnje, Milorad Dodik, në të cilin ky i fundit tha se përfaqësuesit ndërkombëtar në Bosnje po përpiqeshin të minonin të drejtat e serbëve sipas Marrëveshjes së Dejtonit.
“Ne do të bëjmë gjithçka që është e mundur për të ruajtur stabilitetin në rajon”, tha Vuçiç.
Takimi erdhi një ditë pas mbërritjes në Bosnje të pasardhësit të Inzko si Përfaqësues i Lartë Ndërkombëtar, Christian Schmidt, i cili nuk u mirëprit nga Dodik.
Ky i fundit, së bashku me përfaqësursit serb, filloi të hënën bllokimin e funksionimin e institucioneve jetësore qeverisëse në vend: qeverinë qendrore, parlamentin dhe presidencën trepalëshe.
Kjo pasi Republika Srpska nuk e njeh gjenocidin serb dhe pas penalizimit të mohimit nga Inzko, Dodik kërcënoi vendin me shpërbërje në rast të mostërheqjes së vendimit.
Ai e quan atë shkelje të marrëveshjes së Dejtonit, pozicion që, siç pritej, mbështetet edhe nga Beogradi zyrtar.
