Arkeologët në Pompei, qyteti i varrosur në një shpërthim vullkanik në vitin 79 pas Krishtit, kanë zbuluar një dyqan ushqimesh dhe pijesh të freskëta që shërbente si ekuivalenti antik i ushqimit në rrugë për kalimtarët romakë.
I njohur si termopolium, latinisht për banakun e pijeve të nxehta, dyqani u zbulua të shtunën në vendin e parkut arkeologjik Regio V, i cili nuk është hapur ende për publikun.
Gjurmët e ushqimit gati 2,000-vjeçar u gjetën në disa kavanoza të thella “terra-cotta” që mbanin ushqim të nxehtë të cilin pronari i dyqanit e vendoste në një banak me vrima rrethore.
Pjesa e përparme e banakut ishte zbukuruar me afreske me ngjyra të ndezura, disa përshkruanin kafshë që ishin pjesë e përbërësve të ushqimit, të tilla si një pulë dhe dy rosa të varura përmbys.
“Ky është një zbulim i jashtëzakonshëm. Është hera e parë që po zbulojmë një termopolium të tërë, ” tha Massimo Ossana, drejtori i parkut arkeologjik të Pompeit për Reuters.
Pompei, 23 km në juglindje të Napolit, ishte shtëpia e rreth 13,000 njerëzve kur u varros nën hirin dhe llavën e një shpërthimi vullkanik të barabartë me shumë bomba atomike.
