Zgjedhja e Dvoranit anëtar i KED-së, e paligjshme—mandati i tij i pavlefshëm

Nga Redaksia
Zgjedhja e Dvoranit anëtar i KED-së, e paligjshme—mandati i tij i pavlefshëm

Ardian Dvorani është zgjedhur në shkelje të ligjit si anëtar i Këshillit të Emërimeve në Drejtësi. Kandidatura e tij nuk plotëson kushtet ligjore për t’u përfshirë në short e për rrjedhojë për të shërbyer si anëtar i KED-it.

Ligji për Organet e Drejtësisë përcakton se një magjistrant nuk duhet të jetë nën hetim penal, madje as nën hetim administrativ, që të përfshihet në shortin për anëtar të KED-it. Neni 221 përcakton:

“Mund të përfshihen në shortin për zgjedhjen e anëtarëve të Këshillit të Emërimeve në Drejtësi… vetëm nëse magjistrati ose gjyqtari i Gjykatës Kushtetuese nuk është nën hetim ose nuk është dënuar më parë me vendim gjyqësor të formës së prerë për kryerjen e një vepre penale”

Rreth 4 javë më parë, Presidenti Meta paditi Adrian Dvoranin për “shpërdorim detyre” dhe“përvetësimin e kompetencës së detyrës shtetërore” dhe prokuroria ka nisur hetimin bazuar në denoncimin. Dje, prokuroria ka marrë dëshminë e vetë Presidentit Meta në lidhje më çështjen dhe sot ka marrë në pyetje Dvoranin.

Sipas Kushtetutës dhe ligjeve një mandat i siguruar në shkelje të përcaktimeve ligjore është i pavlefshëm dhe nul. Për pasoja edhe vendimet e KED-it ku vota e tij është përcaktuese mund te konsiderohen të pavlefshme.

Adrian Dvorani u zgjodh automatikisht anëtar i KED-it për vitin 2020, duke qenë se ai është i vetmi anëtar i Gjykatës së Lartë i mbetur në detyrë. Gjyqtari tjetër Medi Bici, i konfirmuar nga vetingu, shërben si anëtar i KLGJ-së dhe për rrjedhojë mandat i tij në Gjykatën e Lartë është i pezulluar. Dvorani shërbeu si kryetar i KED-it edhe për vitin 2019.

Duke qenë se përfaqësuesi i Gjykatës së Lartë në KED është me përcaktim ligjor edhe kryetar i Këshillit, roli i Dvoranit në këtë institucion është më i rëndësishëm se i çdo anëtari tjetër. Për këtë arsye, perceptimi publik i figurës së tij është shumë i rëndësishëm për besueshmërinë e gjithë veprimtarisë së KED-it.

Përtej shkeljes së fundit në zgjedhjen e tij në KED, për Zotin Dvorani ekzistojnë një sërë dyshimesh serioze në lidhje me legjitimitetin dhe ligjshmërinë e qenies anëtar i Gjykatës së Lartë.

Sikurse ne kemi theksuar në një koment të mëparshëm, Adrian Dvorani nuk mund të shërbejë si gjyqtar pasi Ligji i Lustracionit ndalon ish-prokurorët e regjimit komunist të përfshirë në procese politike të shërbejnë në organet e sotme të drejtësisë. Zoti Dvorani ka qenë prokuror i një çështje ku disa qytetarë shkodranë u akuzuan për hedhjen e bustit të Stalinit, veprim për të cilin Zoti Dvorani i kërkoi trupit gjykues burgosjen e tyre.

Shumë i dyshimtë është vazhdimi i mbajtjes prej tij i detyrës së gjyqtarit të Gjykatës së Lartë, gjashtë vjet pasi i ka mbaruar mandati 9 vjeçar, dhe në kundërshtim me në vendim të Gjykatës Kushtetuese, duke u justifikuar me boshllëqe ligjore.

Së fundmi, drejtimi prej tij i KED-it gjatë vitit të shkuar ka qenë i dhënuar nga një sërë vendimesh të dyshimta të cilat në dukje përbëjnë shkelje ligjore dhe kushtetuese.

Kallëzimi i Presidentit ndaj tij erdhi pas ngërçit të krijuar Gjykatën Kushtetuese, si pasojë e mos zbatimit nga Dvorani të rradhës kushtetuese të plotësimit të vendeve bosh të Gjykatës Kushtetuese.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>