Zoran Zaev do të jetë kryeministër për një mandat të plotë, raporton Radio Evropa e Lirë. Mbas takimit të zhvilluar mes kryetarit të Lidhjes Social-Demokrate, Zoran Zaev dhe kreut të Bashkimit Demokratik për Integrim, Ali Ahmeti është arritur marrëveshja për koalicionin qeverisës.
Zaev deklaroi se me BDI-në ranë dakort që gjatë mandatit katërvjeçar bashkërisht të punojnë në ndarjen e përgjegjësive sikur dhe përbërjes së qeverisë së re.
“Lufta kundër koronavirusit do të jetë prioritet në punën e qeverisë, sikur edhe standardi ekonomik, rritja e pagave, lufta kundër krimit të organizuar dhe korrupsionit. Jemi pajtuar për forcimin e sistemit të drejtësisë, hetimin e pasurisë së funksionarëve dhe të kaluarën e tyre”
Zaev pohoi se 100 ditë e fundit të qeverisë, kryeministri do të propozohet nga BDI-ja.
Nuk dihet ende se cilat poste do të marrë partia shqiptare.
BDI fitoi 15 deputetë në zgjedhjet parlamentare të 15 korrikut, gjë që e bën faktor në krijimin e koalicioneve për krijimin e mazhorancës qeverisëse.
Ndërsa LSDM-ja ka 46 deputetë. Të dyja bashkë ato kanë 61 mandate nga 120 në total, aq sa nevojitet për të formuar qeverinë e re.
