Opozita bllokoi foltoren e parlamentit, gjatë seancës së sotme. Deputetët e opozitës kërkuan plotësimin e disa kërkesave dhe miratimin e ligjit të “Dekriminalizimit”, ndryshe do të bllokojnë parlamentin.
Kryetari i Grupit Parlamentar, Edi Paloka bëri publike kërkesat e grupit parlamentar të Partisë Demokratike.
“Miratimin e amendamentit në ligjin e dekriminalizimit që largon nga ky Kuvend deri në gjykimin final Armando Prengën; Miratimin e vendimit që fut në zbatim ligjin për dekriminalizimin; Dërgimin nga ky Kuvend në Gjykatën Kushtetuese të kërkesës për heqjen e mandatit të deputetit për Koço Kokëdhimën, Valentina Leskajn dhe Rakip Sulin, të cilët në dhunim të Kushtetutës kanë konsumuar paratë e publikut shqiptar, dhe pasurinë publike ndërkohë që janë vetë deputetë; Heqjen e pengesës të komisioneve hetimore parlamentare ndalimin e zhvlerësimit të tyre, duke hequr instrumentin e kuorumit që e ke përdorur deri më sot vetëm për bllokim.”
Gjithashtu, oficerë të gardës kontrolluan të gjithë deputetët e opozitës pas lajmërimit nga këto të fundit se do të gjuanin me vezë.
