486 persona me koronavirus kanë vdekur në Spanjë në 24 orët e fundit, ndërsa është rritur ndjeshëm numri i rasteve kritike nën terapi intensive.
Sipas Ministrisë spanjolle të Shëndetësisë, numri total i viktimave arriti në 2 206, ndërsa numri i personave të infektuar ka shkuar në 33 089 persona.
Spanja është tani vendi i dytë në Evropë, pas Italisë, për numrin e viktimave dhe të të sëmurëve me Covid-19.
Mes të infektuarve, 3910 ose rreth 12 për qind janë staf mjekësor, infermierë e mjekë.
Ndërkohë, të hënën mbasdite ishin 2 355 njerëz janë në terapi intensive, 30 për qind më shumë se një ditë më parë.
Qeveria spanjolle ka nisur ngritjen e spitaleve të emergjencës dhe po shfrytëzon mjedise dhe hapësira që më parë përdoreshin për panaire dhe ekspozita.
Në Madrid, në një ndërtesë me ambiente për konferenca e ekspozita janë vendosur mbi 1 mijë shtretër.
Institucionet spanjolle po shpresojnë që ky të jetë piku i përhapjes së virusit në vend, por për shkak të periudhës së gjatë të inkubimit të virusit ekziston frika se në dy javët në vijim të rritet numri i personave të spitale dhe trajtime intensive.
Spanja ka marrë 640 mijë kite testimi nga Kina dhe Koreja e Jugut.
Testet do të përdoren së pari për punonjësit e sistemit shëndetësor, të cilët po rrezikojnë infeksionin çdo ditë pasi punojnë për të trajtuar pacientët me koronavirus.
