Kryetarja e LSI-së Monika Kryemadhi akuzoi Kryeministrin Rama se i la gratë naftëtare në grevë për 25 ditë vetëm për “kokëfortësinë e tij”.
“Në 25 ditë ai i la gratë e Ballshit të vuanin të shkojnë nëpër spitale, duhet t’i linte këto gra vetëm për shkak të kokëfortësisë së tij 25 ditë në grevë urie”, tha Kryemadhi në një takim me gratë e njësisë 7 në Tiranë, më 9 nentor.
Ajo tha se për të paguar 20 muaj rroga të prapambetura të naftëtarëve mjaftonte të “vetëm dy ditë të ulte çmimin e naftës”.
Kryemadhi ftoi gratë dhe vajzat të bëhen pjesë e LSI-së:
“Të kërkoni votën për veten tuaj, sepse Monika ka qenë përherë në krahun tuaj, sepse mendoj se sot është më e rëndësishme një inxhiniere e re, një doktoreshë e re, një pedagoge e re të drejtojë politikën sesa një Monikë e vjetër”.
Kryeministri Rama dhe grevistët do të takohen të hënën në Ballsh për të diskutuar mbi plotësimin e kushteve.
