Kreu i PD-së Lulzim Basha akuzoi qeverinë Rama se ka dështuar të menaxhojë pandeminë dhe t’i ofrojë shërbimin e nevojshëm qytetarëve të infektuar.
Gjatë një bashkëbisedimi me qytetarë që e kanë kaluar virusin, Basha theksoi se fatura që i duhet të përballojë një i infektuar është shumë e lartë sepse shteti nuk rimburson asnjë ilaç.
“Qeveria dhe kryeministri janë fajtorë për mosmbulimin e ilaçeve për Covid-19. Spitalet janë plot dhe qeveria nuk hap spitale të reja, duke ndihmuar përhapjen e sëmundjes. Qytetarët e sëmurë janë të paketuar disa veta në çdo dhomë spitali.”
Basha tha se situata në vend nuk do të ishte kaq rëndë nëse qeveria do të kishte pranuar propozimet e PD-së për të përballur pandeminë, duke filluar me rritjen e testimeve.
Ai premtoi se me ardhjen e tij në pushtet, do të bëjë ç’të jetë e mundur që të ‘shërojë Shqipërinë’:
“Ne do të bëjmë gjithçka që ta mundim këtë të keqe në të gjitha dimensionet e saj dhe ta shërojmë Shqipërinë edhe të ecim drejt një të ardhme më të mirë ashtu siç dëshironi ju dhe ashtu siç dëshiron çdo shqiptar.”
