Partia Demokratike, PD njoftoi sot, me 3 maj se po mbledh prova për shkeljet e kryera nga komisionerët e qendrave të numërimit, votimit dhe veprimet e paligjshme të kryera para dhe gjatë procesit zgjedhor të 25 prillit.
Përmes një deklarate për shtyp, Sekretari për Çështjet Zgjedhore, Ivi Kaso pohoi se në disa zona mund të ketë rivotim pasi ka patur parregullsi të mëdha:
“Materialet që ne po nxjerrim do të çohen jo vetëm në SPAK dhe KQZ por besojmë se ato do të çojnë drejt procesit të rinumërimit dhe rivlerësimit të një numri të caktuar votash dhe kutish.”
Ai u shpreh se po hartojnë një raport për shkeljet e kryera. Zonat më problematike, sipas Kasos janë Elbasani, Shijaku, etj.
Kaso pohoi se Kodi i ri Zgjedhore mundëson hapjen e kutive për verifikimin e rregullshmërisë së procesit zgjedhor dhe partive të vogla. Ai shtoi se PD-ja ka bërë 18o kallëzime penale në prokuroritë e zakonshme dhe mbi 40 kallëzime në Prokurorinë e Krimeve Antikorrupsion, SPAK.
