Presidenti serb Aleksandar Vuçiç e ka vënë në dyshim nëse sundimi i ligjit duhet të jetë parësor për vende si Serbia dhe Hungaria. Ai kritikoi Bashkimin Evropian se po kryen një “xhihad të sundimit të ligjit” kundër vendeve që nuk i binden Brukselit.
Të enjten, gjatë një vizite në Hungari për të marrë pjesë në “Samitin IV Demografik të Budapestit” me ftesë të presidentit Viktor Orban, Vuçiçi sugjeroi që sundimi i ligjit është më pak i rëndësishëm sesa “kombet [dhe] fëmijët tanë”.
“Sundimi i ligjit është shumë i rëndësishëm, por në Bashkimin Evropian ai është bërë xhihad i sundimit të ligjit kundër të pabindurve. A është ai vërtet më i rëndësishëm se e ardhmja e kombeve tona, e fëmijëve?” tha Vuçiçi gjatë fjalimit të tij, sipas Katalin Novakut, ministres hungareze për çështjet e familjes në qeverinë Orban.
Ndërsa udhëheqësi i serbëve në Bosnjë, Milorak Dodik, në fjalimin e tij u ankua se politikanët “egoistë” evropianë po zëvendësojnë popujt e Ballkanit me emigrantë, dhe se ai nuk mund të fliste lirshëm në publik për familjen tradicionale: “për gruan që është nënë dhe burrin që është baba”.Ky samit mbahet një herë në dy vjet, në formën e një forumi ku takohen politikanë, udhëheqës të kishës dhe ekspertë për të diskutuar çështjet që prekin familjet.
