Rezoluta, që sapo u votua sot në kuvend, është thjesht raporti përmbledhës i Këshillit të Ministrave “Mbi gjetjet dhe rekomandimet e raportit të Komisionit Evropian për Shqipërinë 2018”. Në të nuk përfshihet asnjë hap konkret që duhet të ndërmarrë qeveria për përmbushjen e kushteve që Shqipëria duhet të plotësojë për hapjen e negociatave me BE-në.
Megjithatë, Kryeministri Rama akuzoi Partinë Demokratike se po mundohet të pengojë hapjen e negociatave të Shqipërisë me BE-në, duke mos votuar rezolutën e Këshillit të Ministrave për rekomandimin e KE-së.
Gjatë seancës plenare, punimet e së cilës deputetët e PD-së i bojkotuan, Kryeministri Rama deklaroi se votimi i rezolutës vetëm nga deputetët e maxhorancës nuk do t’i bindë vendet evropiane për të hapur negociatat me Shqipërinë.
“Edhe sot kur jemi në metrat e fundit të një rruge shumë të gjatë, kur Kuvendi nga detyrë të votojë një rezolutë, opozita ikën nga salla. Ishte një mundësi e mirë që thoshin, se Kuvendi i Shqipërisë është në unanimitet pro hapjes së negociatave.
Kjo rezolutë mund të jetë një arsye më shumë, për t’i thënë atyre që votojnë se ne nuk jemi unanim në çeljen e negociatave.
Akt i pashembullt pabesie historike ndaj këtij vendi dhe populli.”
Gjatë votimit, në Kuvend ishin të pranishëm 74 deputetë, mes të cilëve tre të PDIU-së, një deputet i LSI-së Robert Bitri dhe deputeti i PSD-së Tom Doshi.
