Partia Demokratike akuzoi sot kryeministrin Rama dhe kryebashkiakun Veliaj se po i japin inceneratorit të Sharrës 100 milionë euro shtesë për plehrat e Durrësit.
Përmes një deklarate për shtyp, nënkryetari Edi Paloka e cilësoi dyshen Rama-Veliaj si “mafian e plehrave” e fshehur pas një kompanie fantazmë, e regjistruar në parajsë fiskale:
“Me këmbënguljen e Edi Ramës, shteti shqiptar do t’i kalojë 100 milionë euro për plehrat e Durrësit, kur fare mirë, mund të kishte ndërtuar një landfill modern që zgjidhte problemet mjedisore dhe të pastrimit të qytetit që përballon fluksin më të madh turistrik në vend.
Me firmën e Edi Ramës dhe Erion Veliajt, shqiptarët do t’u paguajnë 3 inceneratorëve, të Tiranës, Elasanit dhe të Fierit, 500 milionë euro, gati aq sa mori borxh dje kreu i mafias së plehrave.”
Paloka tha se ‘mafia e plehrave’ kishte llogaritur me saktësi skenarin për të çuar 100 milionë euro para publike në xhepat e Edi Ramës, Erion Veliajt, Arben Ahmetajt dhe Taulant Ballës:
- Në kulmin e pandemisë, mbyllën venddepozitimin e mbetjeve në Porto Romano, përmes një tenderi të paracaktuar nga Edi Rama.
- Më pas, shpërndanë në disa vende të dukshme mbetjet e Durrësit.
- Pastaj, mafia e la Durrësin pa pastruar, në mënyrë që qytetarët të mërziten dhe të mos interesohen për aferën korruptive 100 milionë euro për largimin e plehrave nga qyteti.
- Dhe në fund, i dogjën plehrat publkisht, duke shkaktuar një katastrofë mjedisore në Manzë, në një zonë që merr vëmendjen si nga Tirana, ashtu edhe nga Durrësi.
