Kryetari i Grupit Parlamentar të PS-së Taulant Balla ka dënuar vendimin e gjykatës së Apelit për çështjen e privatizimit së CEZ-it.
Gjykata e Apelit la në fuqi vendimin e shkallës së parë, sipas së cilit kjo çështje mbyllet.
Balla e quajti vendimin e Apelit si një vendim që bie ndesh me pritshmëritë e shqiptarëve dhe të partnerëve të Shqipërisë për hetimin e dinosaurëve të korrupsionit.
Në një postim në Facebook, Balla u shpreh:
“Dosja CEZ është shembulli i pagesave të tarifës së korrupsionit me plotë 6.8 milionë Euro brenda një dite të vetme në qershor 2009, 2 javë pas privatizimit OSSH, 2 javë para zgjedhjeve parlamentare të Qershorit 2009. Paratë dolën ditën me diell me thasë nga Banka Raiffeisen në qendër të Tiranës. ”
Balla tha se do ta apelojë vendimin e Apelit për të pushuar çështjen.
Sipas socialistëve privatizimi i CEZ-it i shkaktoi 400 milione euro dëm shtetit shqiptar. Për këtë arsye, në vitin 2016, Kuvendi ngriti komision hetimor për këtë çeshtje.
Kontrata me kompaninë çeke u prish nga qeveria Rama në vitin 2014, e cila ra dakord të mos shkonte në arbitrazh por t’i paguante CEZ-it rreth 100 milionë euro dëmshpërblim. Opozita e akuzoi Kryeministrin se i kishte falur kompanisë borxhet që ajo ishte zotuar të shlyente duke sjellë një dëm prej rreth 650 milionë eurosh.
