Shqipëria i ka shitur armë luftarake Republikës Demokratike të Kongos pa njoftuar Kombet e Bashkuara sipas marrëveshjes së 2004, shkruan raporti i fundit i Këshillit të Sigurisë së Kombeve të Bashkuara, i parë nga Agjensia Franceze e Lajmeve (AFP).
Ekspertët e KB thanë se armët dhe trajnimet, përveç Shqipërisë, janë shitur edhe nga vende të tjera si Rumania, Turqia, Afrika e Jugut, Izraeli, Kina, Irani, Britania, Korea e Veriut, Sudani dhe SHBA-të.
Disa armë kanë rënë në duart e grupeve të armatosuar në lindje të vendit, lajmëron raporti konfidencial i ekspertëve të KB i parë nga Agjensia Franceze e Lajmeve, më 19 qershor.
Pas këtyre raportimeve, Exit News kontaktoi me një zëdhënës të Kryeministri Edi Rama, i cili përmes një mesazhi në WhatsApp i mohoi këto akuza, duke nisur një deklaratë të vitit 2011, të lëshuar nga ish zëdhënësi i atëhershem i Ministrisë së Mbrojtjes Edvin Kulluri.
“Në përgjigje të akuzave të të ashtuquajturit skandal i përdorimit të armëve shqiptare në luftën në Kongo, Ministria e Mbrojtjes sqaron se nuk ka asnjë skandal dhe as lajm. Shitja e armëve nga qeveria është ligjore. Kjo shitje u raportua tek Kombet e Bashkuara, dhe u publikua në faqen zyrtare të Agjensisë së Kontrollit të Eksporteve Shtetërore”, tha atëherë Ministria e Mbrojtjes.
Në fakt raporti i parë nga AFP i përket kohëve të fundit. Exit News i kërkoi edhe një deklaratë zyrtare zëdhënësit të kryeministrit, por deri më tani nuk ka marrë asgjë.
Republika Demokratike e Kongos është një nga pikat e zjarrta të Afrikës, e kapur nga dhuna ushtarake, prej së cilës muajt e fundit kanë humbur jetën më shumë se një mijë njerëz dhe janë larguar më shumë se gjysëm milionë qytetarë.
