Agjensia shteterore për Shpronësim kërkoi të premten shpronësimin e godinës së Sarajeve. Vlera e shpronësimit llogaritet në rreth 506 milionë lekë. Godina, sipas njoftimit të Bashkisë Tiranë do të shnëdërrohet në muze etnografik.
Kërkesa për shpronësim u bë më 19 gusht.
Në orët e para të së martës, i është vënë zjarri nga persona të paidentifikuar vilës Sarajet, në rrugën Abdi Toptani, në pjesën para Qendrës Toptani, përballë Hotel Plaza.
Pas ndërhyrjes së zjarrfikësve, zjarri është fikur dhe vila ka mundur të rezistojë pa u shembur.
Vila e famshme, e cila ka shërbyer si legata e parë amerikane në Shqipëri, ishte nga të paktat ndërtesa të vjetra të mbetura në Tiranë pa u shëmbur për t’ja lënë vendin ndërtimeve të larta.
Sikurse Exit ka informuar më parë, në truallin e vilës është planfikuar të ngrihet një kullë 45 katëshe. Duke qenë se Vila Sarajet është monument kulture i mbrojtur, shembja e saj ishte e vështirë ligjërisht. Tani që vila është djegur, kjo pengesë për ndërtimin është zhdukur.
Para pak muajsh kryebashkiaku Veliaj ishte shprehur se do ta shpronësnte vilën për ta kthyer në muze dhe siç kemi raportuar ky veprim u konsiderua si hapi i parë për të realizuar shembjen e vilës për të ndërtuar mbi truallin e saj.
