Ambasadori gjerman Helmut Hoffman ka dhënë, ditën e mërrkurë, një intervistë për Tema TV, në të cilën ka folur për çështjesh politike të ditës. Më poshtë, janë disa nga opinionet që ai shprehu në intervistë.
- “Në se i referohemi progres-raportit të nëntorit të vitit të shkuar, ai është mjaft i qartë – kushti thelbësor për hapjen e negociatave është pikërisht përmbyllja e reformës në sistemin e drejtësisë.”
- “Secila palë duhet të bëjë kujdes në qëndrime që drejtësia të mos jetë pronësi e askujt.”
- “Në këndvështrimin tim do të ishte një hap i mënçur në se partitë do të udhëhiqen nga ato çfarë do të thonë ekspertët dhe kryesisht ata të komisionit të Venecias.”
- “…stil i të bërit politikë në Shqipëri është i një agresiviteti verbal që shkon tej të zakonshmes, aq sa duket se çdo lloj metode është e lejueshme, mjafton të arrish pushtetin që synon.”
- “Shpesh herë kam pyetur veten në se këta persona që ndërmarrin të tilla sulme ndaj kundërshtarit politik, arrijnë të jenë të qartë për efektet që ka në kryeqytetet e vendeve të Bashkimit Evropian kjo prirje e tyre për të shpifur kundër kundërshtarit politik, duke përdorur në mënyrë të fryrë gjithë fjalorin poshtërues kudnër kundërshtarit. Por, gjithashtu, jam i bindur se ky problem nuk mund të zgjidhet duke përdorur të drejtën penale apo legjislacionin penal në fuqi. Ajo çfarë duhet bërë është ndryshimi i kulturës politike.”
- “Kam konstatuar se flitet shumë, mbahen shumë monologje, dëgjohet shumë pak dhe më pak reflektohet rreth asaj që thuhet. Mendoj se, në se do të dëgjonin më shumë njëri-tjetrin, do të ishte shumë e lehtë për të kuptuar dhe për të gjetur një qasje konstruktive ndaj njëri-tjetrit. Për pasojë do të ishte shumë e lehtë gjetja e gjuhës së kompromisit mes palëve.”
- “Në vitin 2015 ka pasur për rreth 55 mijë azilkërkuesish shqiptarë në Gjermani, që është një shifër në mënyrë absurdë mjaft e lartë… Të gjithë shtetasit shqiptarë që kanë kërkuar azil në Gjermani e kanë bërë për arsye ekonomike dhe se kërkonin mundësi punësimi.”
