Policia e Durrësit arrestoi sot administratorin dhe inxhinierin e firmës ndërtuese të një pallati, ku dje humbi jetën roja.
Thoma Rusa, 62 vjeç, ra nga kati i dytë i pallatit në ndërtim dhe humbi jetën menjëherë.
Administratori dhe inxhinieri i firmës akuzohen për shkelje të rregullave të mbrojtjes në punë.
Kjo është ngjarja e dytë e rëndë brenda muajit janar, ku punëtorët humbasin jetën në punë.
Në fillim të janarit, në Korçë, një punëtor humbi jetën dhe një tjetër u plagos për shkak të moszbatimit të rregullave të punës me betonieren, teksa po punonin në një objekt 4-katësh.
Ndërkohë 34 punëtorë kanë humbur jetën si pasojë e aksidenteve në punë, në periudhën janar-nëntor 2019. Industria e ndërtimit është ajo ku është shënuar numri më i lartë i aksidenteve dhe i viktimave.
