Presidenti i Azerbajxhanit Ilham Aliyev i kërkoi, të dielën, Armenisë të përcaktojë një afat kohor për tërheqjen e trupave të saj nga rajoni i Nagorno-Karabakut dhe tha që Azerbajxhani nuk do të pushojë veprimet ushtarake derisa të ndodhë kjo.
Në një fjalim televiziv drejtuar qytetarëve, Aliyev tha se forcat azere po luftojnë për të rimarrë tokat që ata humbën ndaj armenëve etnikë në vitet 1990.
Përmbajtja dhe toni i mesazhit të Aliyevit bëri të qartë se Azerbajxhani nuk do të pranojë armëpushim, siç kanë kërkuar vazhdimisht Rusia, Shtetet e Bashkuara dhe Bashkimi Evropian.
“Azerbajxhani ka një kusht, dhe ai është çlirimi i territoreve të tij,” tha ai. “Nagorno-Karabak është territori i Azerbajxhanit. Ne duhet ta rimarrim.”
