Një variant i ri, potencialisht më infektiv i koronavirusit të ri që shkakton COVID-19 është gjetur në Britani në raste të lidhura me Afrikën e Jugut, tha të mërkurën Sekretari Britanik i Shëndetësisë Matt Hancock.
Departamenti i shëndetit i Afrikës së Jugut tha javën e kaluar se një mutacion i ri gjenetik i virusit ishte zbuluar dhe mund të jetë përgjegjës për një rritje të fundit të infeksioneve atje.
“Falë aftësisë mbresëlënëse gjenomike të Afrikës së Jugut, ne kemi zbuluar dy raste të një varianti tjetër të ri të koronavirusit këtu në MB,” tha Hancock në një konferencë për media.
Britania tashmë është duke u përpjekur të frenojë përhapjen e një lloji të ri të virusit i cili është deri në 70% më i transmetueshëm.
“Ky variant i ri është mjaft shqetësues, sepse është akoma më i transmetueshëm dhe duket se është ndryshuar më tej ndërkohë që është zbuluar varianti i ri në MB”, tha ai.
Sekretari i Shëndetësisë deklaroi se janë vendosur në karantinë dy raste e para të konfirmuara si dhe të gjithë personat që patën kontakte me ta.
“Këto masa janë të përkohshme ndërsa ne po hetojmë më tej këtë lloj të ri i cili së shpejti do të analizohet në Porton Doën”, tha ai.
Një numër në rritje i shteteve evropiane kanë ndaluar udhëtimin nga Britania e Madhe, si përpjekje për të ndaluar një lloj të ri të koronavirusit, i shfaqur në Britani, që të përhapet dhe më shumë.
Franca, Gjermania, Italia, Zvicra, Portugalia, Belgjika, Austria, Bullgaria, Danimarka, Finlanda, Rumania, Suedia, Kroacia dhe Hollanda kanë thënë se do të ndalojnë të gjitha fluturimet që vijnë nga MB.
