Rrjeti social Facebook ka fshirë një postim nga faqja zyrtare e presidentit amerikan Donald Trump, me argumentin se përmbante ‘pretendime false’ për koronavirusin.
Postimi përmbante një video të intervistës së Trump në emisionin “Fox & Friends” mëngjesin e së mërkurës, në të cilën ai deklaroi se shkollat mund të rinisin mësimin në klasa pasi të rinjtë janë “pothuajse imunë” nga virusi.
Në një deklaratë për median, një zëdhënës i Facebook-ut deklaroi se:
“Kjo video përfshin pretendime të rreme se një grup njerëzish janë të imunizuar nga Covid-19 që është një shkelje e politikave tona rreth dezinformimit të dëmshëm për Covidin.”
Kjo është hera e parë që rrjeti social heq një postim nga faqja e presidentit lidhur me virusin. Më herët Facebook ka hequr postimet reklamuese të Trumpit.
