Princit Philip iu dha lamtumira e fundit të shtunën pas një ceremonie mortore në nder të jetës dhe shërbimit të tij ndaj vendit, kurorës dhe gruas së tij, Mbretëreshës Elizabeth II.
Monarkja britanike u ul e vetme gjatë ceremonisë në kishë si shembull për respektimin e distancës në kushtet e pandemisë.
E gjithë ceremonia funerale u zhvillua jashtë syve të publikut brenda zonës së Windson Castle, një rezidencë mbretërore 950-vjeçare në perëndim të Londrës, por u shfaq drejtpërdrejt në televizion.
Vetëm 30 persona u lejuan të merrnin pjesë në funeral, përfshi mbretëreshën, katër fëmijët e tyre dhe tetë nipërit.
Njerëzit në të gjithë Britaninë mbajtën një minutë heshtje për nder të princit pak para se të fillonte funerali i tij.
