Gjykata Administrative Tiranë ka vendosur, të hënën, shfuqizimin e vendimit të Entit Rregullator të Energjisë që i hapte rrugë ndërtimit të dy HEC-eve në Sekë dhe Zais, në Bashkinë Mat.
Lajmi u bë publik nga vetë banorët e zonës së Parkut Kombëtar Zall-Gjoçaj, të cilët kanë protestuar disa herë kundër ndërtimit të dy hidrocentraleve në Sekë dhe Zais.
Nuk dihet akoma nëse kompania shoqërisë “Seka Hydropower” shpk do ta apelojë vendimin.
Banorët e zonës pretendojnë se ndërtimi i hidrocentraleve nuk do t’i lejojë më ata që të përdorin ujin, përmes të cilit ata sigurojnë jetesën e tyre, si dhe do të dëmtojnë zonën. Ata kanë protestuar disa herë gjatë këtij viti, madje disa herë dhe përpara zyrës së Kryeministrit Rama.
Qeveria Rama dha lejet për ndërtimin e dy hidrocentralve në tetor të vitit 2018. Këto leje janë pjesë e 100 lejeve për HEC-e të lëshuara nga qeveria Rama në 5 vitet e fundit.
Kryeministri Edi Rama tha në korrik se qeveria nuk do të japë më leje për HEC-e të vogla, pasi ato ishin “të padobishme dhe të dëmshme”. Sidoqoftë, asgjë nuk është bërë për dhjetëra leje tashmë të dhëna, shumica prej tyre në zonat e mbrojtura.
Një investigim i gazetarit Artan Rama zbuloi se qeveria ka miratuar në total 714 kontrata koncesioni për hidrocentrale, por vetëm ka njoftuar publikisht vetëm për gjysmën e tyre. Kontratat e koncesionit lëshohen përpara se të jepen lejet e ndërtimit të HEC-ve.
