Agjensia e policisë evropiane, Europol, njoftoi të hënën gjurmimin e një rrjeti ndërkombëtar të trafikut të emigrantëve, kryesisht shqiptar, drejt Britanisë dhe Shteteve të Bashkuara.
18 persona u arrestuan në Spanjë, pas një operacioni të udhëhequr nga policia spanjolle, me bashkëpunim të ngushtë me policinë shqiptare dhe autoritetet e zbatimit të ligjit e emigracionit në Austri, Francë, Itali, Slloveni, Kosovë , Portugali, Mbretërinë e Bashkuar dhe Shtetet e Bashkuara, të mbështetura nga Europoli.
Bëhet fjalë për një operacion të madh, gjatë të cilit fillimisht u identifikuan trafikantët që prisnin emigrantët në aeroportet e Britanisë dhe Irlandës. Më pas, me ndihmën e agjensisë amerikane të Homeland Security, u bë e mundur të mbërrihej tek qeliza e grupit në Spanjë.
“Nga atje, i dyshuari dhe bashkëpunëtorët e tij lehtësuan hyrjen e paligjshme të migrantëve përmes aeroporteve të ndryshme në Spanjë dhe Portugali në Mbretërinë e Bashkuar, ndërsa u siguruan atyre karta identiteti franceze të falsifikuara,” shkruhet në njoftimin zyrtar të Europol-it.
Në fazën e mëhershme të hetimit një tjetër grup trafikantësh u kap në ishullin Saint Maarten të Karaibeve, të cilët kontrabandonin emigrantë shqiptarë me dokumente të falsifikuara drejt Shteteve të Bashkuara.
Korrierët, që shpërndanin në Kosovë dhe Shqipëri dokumentet e falsifikuara u arrestuan në dhjetor 2020, ndërkohë që në mars 2021 u gjetën në Kosovë edhe 4 baza, ku fabrikoheshin dokumente të falsifikuara.
Hetimet për rastin vazhdojnë pasi janë gjetur lidhje me 3 çështje kriminale të hapura në SHBA, ndërkohë deri tani janë ndalur rreth 400 emigrant të paligjshëm, janë sekuestruar rreth një mijë dokumente të falsifikuara dhe janë arrestuar gjithsej 46 persona.
