Kosova ka bërë progres dhe ka plotësuar kriteret e vendosura nga BE për liberalizimin e vizave, ndaj Komisioni Evropian do të rekomandojë lëvizjen e lirë të shtetasve kosovarë.
Këtë lajm e bëri publik Dimitris Avramopoulos, Komisioneri Evropian për Migracionin, Çështjet e Brendshme dhe Shtetësinë .
Komisioneri Avramopoulos deklaroi:
“Një kapitull i rëndësishëm në historinë tonë të përbashkët: Kosova i plotëson kriteret për liberalizim të vizave. Pas shumë vitesh e muajsh të përpjekjeve dhe punës së madhe, Komisioni tashmë konfirmon se Kosova i ka përmbushur të gjitha standardet për liberalizimin e vizave. Tash, ne inkurajojmë Këshillin dhe Parlamentin Evropian që të lëvizin përpara me propozimin tonë. ”
Rekomandimi i Komisionit do të votohet nga Parlamenti Evropian më 29-30 gusht dhe më pas do të votohet sërish nga Këshilli i Ministrave të BE-së.
Sot në orën 16:30, komisioneri Avramopoulos do të mbajë një konferencë zyrtare për shtyp bashkë me presidentin e Kosovës Hashim Thaçi, ku do të japin lajmin për median.
Ndërkohë të tjerë drejtues të lartë të Kosovës e kanë quajtur këtë hap si shumë të rëndësishëm dhe janë shprehur optimist se votimi nga institucionet e BE-së do të jetë pro qytetarëve kosovarë.
