Manjola Kajana emërohet prokurore në SPAK

Nga Exit News
Manjola Kajana emërohet prokurore në SPAK

Manjola Kajana është prokurorja e 13-të që emërohet në Prokurorinë Speciale Anti Korrupsion (SPAK).

Këshilli i Lartë i Prokurorisë ka emëruar, të hënën, Kajanën si anëtare të SPAK-ut, pas kalimit të të dyja shkallëve të procesit të vetingut.

Në 10 korrik, Kolegji i Posaçëm i Apelimit konfirmoi në detyrë prokuroren Kajana.

Kajana është renditur nga Këshilli i Lartë i Prokurorisë e teta mes 15 kandidatëve për në SPAK.

Fillimisht ajo u konfirmua në detyrë më 18 qershor, nga trupa e KPK-së e përbërë nga Olsi Komici, Brunilda Bekteshi dhe Lulzim Hamitaj.

Por në gusht 2019, Komisioneri Publik kërkoi shkarkimin nga detyra të prokurores.

Komisioneri Publik pretendonte se në fazën e parë të vetingut nuk është bërë hetim i plotë për pasurinë e prokurores. Ai i kërkoi Kolegjit të Apelimit rihetimin e pasurisë.

Më saktësisht, KP dyshonte për mundësitë e prokurorës për të kursyer mjaftueshëm nga rroga e saj gjatë viteve, sa për të blerë një apartament me sipërfaqe 110 metër katrorë në Tiranë, me vlerë rreth 43 mijë euro.

Po ashtu, prokurorja ka deklaruar se për blerjen e këtij apartamenti ka përdorur dhe të ardhurat e bashkëshortit nga punë në një kompani private në vitet 2013-2014.

Por nga dokumentet pranë Institutit të Sigurimeve Shoqërore rezulton se bashkëshorti i prokurores nuk ka paguar sigurime dhe taksa për periudhën dhjetor 2012 – maj 2015.

LEXO  Dyshime mbi qëllimin e shkrirjes së urgjencës Mjekësore të Tiranës

Po ashtu, bashkëshorti i Kajanës ka aplikuar si i pastrehë për të përfituar kredi të butë nga Bashkia Fier në vitin 2012. Në këtë kohë, prokurorja Kajana ka punuar në Fier dhe ka pasur nën hetim ish-kryebashkiaku Baftjar Zeqaj dhe zyrtarë të tjerë pikërisht për abuzime të dyshuara në dhënien e kredive të buta për familjet e pastreha.

Të gjitha këto pretendime, KPA-ja i hodhi poshtë, duke konfirmuar në detyrë prokuroren Kajana.

Adresa juaj e emailit nuk do bëhet publike.

Lajme te ngjashme