Procesi i vaksinimit të koronavirusit në Gjermani u ngadalësua dhe ata njerëz që nuk kanë shfrytëzuar rastin për të bërë vaksina do të duhet të bëjnë teste COVID-19 për të marrë pjesë të plotë në jetën publike, tha kancelarja Angela Merkel, të martën.
Për të nxitur më shumë njerëz që të vaksinohen, Merkel tha se qeveria do të ndalojë ofrimin e testeve falas nga 11 tetori, përveç atyre për të cilët nuk rekomandohet vaksinimi, siç janë fëmijët dhe gratë shtatzëna.
Qeveria gjithashtu do të kërkojë që njerëzit ose të vaksinohen, të kenë test negativ ose të kenë një certifikatë shërimi për të hyrë në restorante, në ceremonitë fetare dhe të bëjnë sporte në ambiente të mbyllura.
Më pak se shtatë javë para zgjedhjeve federale, Merkel dhe udhëheqësit e 16 shteteve të Gjermanisë u takuan për të diskutuar masat për të shuar një valë të re infeksionesh, të nxitur nga përhapja e variantit të koronavirusit Delta, dhe për të shmangur kufizimet.
Gjermania i kishte bërë testet falas për të gjithë në mars për të bërë të mundur një kthim gradual në jetën normale pas disa muajsh bllokimi. Edhe pse rreth 55% e gjermanëve janë plotësisht të vaksinuar, ritmi i vaksinimit është ngadalësuar.
Në Francën vaksinimet u rritën pasi Presidenti Emmanuel Macron vendosi detyrimin e paraqitjes së një leje shëndetësore për shumë aktivitete të përditshme, megjithëse plani ka shkaktuar gjithashtu protesta masive.
