Presidenti Ilir Meta ka dekoruar ish-presidentin Rexhep Meidani me dekoratën ‘Urdhri i Flamurit Kombëtar’, dekorata më e lartë e shtetit shqiptar.
Në 76-vjetorin e lindjes së Meidanit, Meta ka vendosur ta dekorojë atë për përgjegjësinë e lartë shtetërore të treguar si president, për kontributin për reformën e rëndësishme të Kushtetutës, për mbajtjen e referendumit të Kushtetutës në vitin 1998, për ngritjen dhe forcimin e institucioneve të pavarura, si dhe për mbështetjen për çështjen e Kosovës.
Gjatë ditës së hënë pritet që të zhvillohet dhe një ceremoni për nder të Meidanit në presidencë.
Rexhep Meidani ka qenë president i vendit nga korriku 1997 deri në korrik 2002. Ai njihet si një ndër figurat më historike të Partisë Socialiste.
Dekorata ‘Urdhi i Flamurit Kombëtar’ është dekorata më e lartë e nderit e Republikës së Shqipërisë që u jepet qytetarëve shqiptarë dhe të huaj për merita të jashtëzakonshme për lartimin e kombit shqiptar dhe të Shqipërisë.
Më herët këtë dekoratë e ka marrë presidenti amerikan Xhorxh W. Bush, presidenti i Kosovës Ibrahim Rugova dhe ish-presidenti dhe ish-kryeministri Sali Berisha.
